Hei gut, 15!

Det var eit skikkeleg vanskeleg spørsmål du kom med. Eg er ikkje sikker på kva du meiner. Men dersom du tenkjer på nervesystemet, altså hjernen og nervane i kroppen, så kan rusmiddel øydeleggje på mange ulike vis. Særleg alkohol kan skade heile nervesystemet, både fordi han er ei nervegift, og fordi ein kan få mangel på B-vitamin som óg er skadeleg. Andre rusmiddel kan skade hjernen, til dømes vil cannabis kunne gi varig hjerneskade dersom ein startar tidleg og bruker mykje. Amfetamin, kokain og ecstacy kan gi hjerneslag. 

Dersom du meiner "nervar" i tydinga psykiske plager, vil alle rusmiddel kunne gi angst, depresjon, søvnvansker, og nokre kan óg gi alvorlege psykiske lidingar og føre til sjølvmord. Stort sett kjem det an på kor mykje du bruker, men nokre få menneske har fått alvorlege psykiske lidingar etter berre nokre få doser med til dømes cannabis. Spesielt gjeld dette syntetisk cannabis, som vi veit er sterkare enn vanleg hasj eller marihuana. 

Det er store skilnader mellom ulike menneske på kor mykje rusmiddel ein tåler før ein gjer skade på nervesystemet eller får psykiske problem av rusbruken.

Med helsing

Dagfinn Haarr
kommuneoverlege